Welcome

مرحبا بكل الزوار

أهلا وسهلا بكم في مدونتي

لاستضافة موقعك

2012/08/29

كنت فين من زمان


2012/08/28

لقاء مع أيمن راشد



السلام عليكم ورحمة الله وبركاته،،
سبق وان التقيت مع المهندس أيمن راشد مؤسس موقع اطلب.كم فى مؤتمر عرب نت..
وكتبت مقالة فى هذا الحين يمكنكم متابعتها عبر الرابط التالى ..
وايضا يمكنكم معرفة المزيد عن المهندس أيمن راشد من المقالة التى كتبها المبدع رءوف شبايك عنه عبر الرابط التالى ..
وكان لى شرف لقاءه وانفرد به لعمل لقاء صحفى عن تجربته مع موقع اطلب.كم فى مكتب شركته الجديدة IT-Blocks ..
ملاحظة: حيث انى كنت قد تحدثت عن المهندس أيمن سابقا فانى تجنبت الحديث عن الأمور المعروفة والتى تم ذكرها فى المقالة السابقة عن نشأته وبدايته..
كيف كانت بدايتك مع الكمبيوتر والويب ؟
بعد تخرجى من كلية الهندسة، كنت متخيل انى هبقى معيد، ولكن ده ماحصلش .. واتعينت فى مركز بحوث البناء وهو مجال اكاديمى برضه.. لكن هناك جالى احباط فظيع، ماكنش فى اى دور بنعمله غير اننا نروح نمضى ونمشى آخر النهار.. ابتديت اعمل ماجستير فى الهندسة المدنية.. بعدين بصيت حواليا وحسيت انى مش عاوز ابقى زى الناس دى، هما كويسين وعلى عينى وعلى راسى، لكن انا مش عاوز ابقى كده.. بصيت على اصحابى اللى حسيت انهم بيعملوا حاجة كويسة، فلقيت انه كله فى مجال الـ IT .. والمجال التانى اللى لفت نظرى ساعتها كانت وزارة الخارجية.. نزل اعلان الاى تى اى اول دفعة.. وبالمناسبة انا لما كنت متخرج من الكلية ماكنتش اعرف اى حاجة عن الكمبيوتر وكنت حاسس انها حاجة مالهاش لازمة.. يمكن اتعلمت برنامج صغير كان بينفعنا فى مجال الهندسة المدنى .. وبعدين لما كنت شغال على الماجستير كان لازم اعمل برنامج علشان يحل المسائل.. وماكنش عندى الفكر التجارى للبرمجة ساعتها، بس كنت بحاول انى اعمل حاجة تاخد منى معطيات وتدينى نتائج للمسائل اللى بتقابلنى.. وحسيت انى فاهم اهو وبقدر اعمل برنامج واقدر اعدل عليه.. واتقبلت فى الاى تى اى وما اتقبلتش فى الخارجية.. فى الاول ماكنتش فاهم اوى او على الاقل بالنسبة للى كانوا معايا فى الدورة.. وفى خلال فترة الدورة ناقشت الماجستير.. وبعد كده انتقلنا لمرحلة متقدمة وابتدينا نتعلم لغات برمجة.. بعد الدورة اشتغلت شوية فى مجلس الوزراء لمدة 3 سنين وشوية واتعلمت فيها حاجات كتيرة واخدت شهادة الـ MBA، وبحكم منصبى فى المكان ده حسيت ان المكان ده مش هيكمل.. فى الوقت ده جتلى فرصة انى اروح السعودية، وكنت انا ومدير الشركة بس.. ابتدت الشركة بينا احنا الاتنين بس ووصلت 14 مهندس وفيها شغل كويس.. بس ورجعت مصر تانى.. ابتدى من الصفر تقريبا
حدثنا عن بداية فكرة أطلب.كم ؟
كنت راجع من السعودية حاسس انى اقدر اعمل شركة لوحدى واكبرها، بس كانت المشكلة انى هعملها ازاى.. مفيش رأس مال.. ساعتها جاتلى فكرة اطلب.كم فى لحظة كده.. حسيت انها زى الهام من عند ربنا شفتها كاملة لغاية اخرها .. ابتديت اتكلم مع اصحابى عنها لكن اغلبهم ماكنش مشجع للفكرة.. لكن مصطفى اللى هو بقى شريكى بعد كده اعجب بيها جدا وشجعنى “يلا مستنى ايه، دى فكرة حلوة ونفذها ” .. التنفيذ كان صعب، مهما كان حتى لو بتعمل شركة صغيرة انت بتجمع بيانات وبتشتغل باشكال كتيرة.. احنا الاتنين كنا بنشتغل عليها.. كان عندنا مسئوليات تانية غيرها بس كنا بنشتغل عليها والحمد لله ربنا وفقنا فيها.. فى ناس بتدخل على الموقع، وناس بتطلب ..
كان موقع اطلب فيه حاجة لذيذة. انك وانت بتعمل طلب من على اطلب.كم بتقول للى جنبك انك بتعمل طلب من عليه.. وده ساعدنا اكتر على انتشار الفكرة.. هى كانت بتحل مشكلة فى وقتها وهى ان ارقام التليفونات للمطاعم صعبة شوية وفى نفس الوقت التواصل مع المطاعم نفسه صعب.. كان بتحل المشكلة بطريقة بسيطة وسهلة جدا.. وبرضه فى نفس الوقت كنا حاطين ارقام تليفونات المطاعم على الموقع علشان لو انت عاوز تطلب بنفسك مباشرة ممكن تجيب رقم المطعم من على اطلب وكفاية علينا زيارتك للموقع.
عند انتقالك من العمل كمهندس مدنى الى مبرمج كان من الطبيعى ان تواجه الفكرة بالرفض بين المحيطين بك، كيف كان تقبلك لرفضهم ؟ وكيف كان تصرفك لتقنعهم بدعمك ؟
اكيد طبعا كان فى بعض المقاومة.. لكن هما كانوا شايفين ان انا مش مبسوط.. وشافوا بسرعة ان حالتى النفسية اختلفت للاحسن.. لكن اه كان فى ضغوط كتيرة وخصوصا ان عيلتى كلها مهندسين مدنى.. لكن انا كنت واخد قرارى..
عندما بدأت فى برمجة الموقع، ماهى اللغة التى اعتمدت عليها وكذلك نظام التشغيل ؟ 
فى الوقت ده ماكنش فى حاجة نسمع عنها غير الـ ASP. وبعدين انا ماخدتش قرار تقنى بشكل كبير.. لكن احنا بنينا بالتكنولوجيا اللى استخدمها الراجل اللى جه كاتبلنا اكواد لان انا ومصطفى مش مبرمجين اوى يعنى نفهم فى الاكواد وسطور الاوامر لكن مش نعمل موقع كامل.
وانطلق اطلب.كم ، ماهى الخبرات والمهارات التى وجدت نفسك في حاجة اليها اثناء عمل الموقع ؟
لما ابتدى المشروع ينتشر والناس تسمع عنه، جاتلنا دعاوى اننا نتكلم فى مؤتمرات وندوات مختلفة.. وابتدى يجلنا رجال اعمال ومستثمرين ويسألونا عن خطة العمل Business plan للموقع.. احنا ماكناش نعرف تتعمل ازاى خطة العمل دى وبدأنا نسأل اصحابنا عليها واتعلمناها.
تم بيع الموقع بعد انطلاقته بحوالى 7 شهور، ما السبب فى ذلك ؟
بعد افتتاح الموقع بـ 7 شهور جالنا عرض كويس لبيع الموقع.. بصراحة فى الوقت ده انا كنت رافض.. كنت متعود اقول ان (اطلب) دى بنتى بس مصطفى قالى “انت رافض ليه، اطلب مش بنتك، وبعدين انت حسب حساباتك احنا هنجيب الرقم ده خلال خمس سنين، طيب احنا ليه نستنى خمس سنين علشان نجيب الرقم ده لما احنا نقدر نجيب الرقم ده دلوقتى. احنا عندنا حاجات عاوزين نعملها، ليه نستنى خمس سنين مادمنا نقدر نعملها دلوقتى” وبصراحة اقتنعت بفكرته.
طيب كلمنا عن فريق عمل الموقع ؟
فى الوقت ده كان عندنا 4 اعضاء فى الفريق، 3 منهم operators  اما الرابع فكان developer .. وبصراحة الفريق ده كان موفق لابعد الحدود.. وكان من اسباب نجاح الموقع بشكل كبير.. بالرغم من اننا مكناش بنشرف عليهم بالمعنى المفهوم لكن هما كانوا عاوزين يعملوا حاجة.. ساعات كتيرة كانوا بيعملوا حاجات من غير ما نطلبها منهم.. مثلا لو واحد مشى قبل ميعاده بربع ساعة بيقعد يعتذر انه مشى بدرى الربع ساعة دى.. بينزلوا من نفسهم يجيبوا تحديث لقوائم الاسعار علشان يحدثوها على الموقع .. وبصراحة كان توفيق من ربنا كبير ..
اخيرا تحب تقول ايه للشباب اللى عاوز يعمل حاجة جديدة ؟
بقابل شباب كتير بس مابتعجبنيش افكارهم وبقولهم ما تقعدش تحلم لوحدك لازم الحلم بتاعك يكون بيلاقى قبول.. يعنى تحلم انا هعمل كذا فالناس هتيجى.. لأ لازم تفكر كويبس الناس هتجيلك ليه والناس هتدفعلك ليه.. لازم تحل مشكلة حقيقية موجودة

المصدر: إندزة خان
السلام عليكم ورحمة الله وبركاته
أعتذر أصدقائي ومتابعيني
لقد انشغلت عنكم كثيرا الفترة الماضية 
وها أنا أعود إليكم من جديد
أتمنى أن أفيدكم وأن تستمتعوا بعودتي بينكم